Lees: Jesaja 1. HK Sondag 33, vraag & antwoord Dordtse Leerreëls 1:13. Teks: Jesaja 1:3, HK Sondag 33, vraag & antwoord 89 & 90

Transcription

1 Lees: Jesaja 1 HK Sondag 33, vraag & antwoord Dordtse Leerreëls 1:13 Teks: Jesaja 1:3, HK Sondag 33, vraag & antwoord 89 & 90 Sing: Psalm 86:6-8 Tema: Jou Eienaar eis terugkeer (Inleidend) n Os ken sy besitter en n esel die krip van sy eienaar... Juda het haar Eienaar versaak. Hulle het vergeet waar hulle krip, hul voeding, hulle bron van lewe vandaan kom. Bekering was baie dringend nodig. Wat maak ons met hierdie geskiedenis van n volk honderde jare gelede? Het ons dieselfde Eienaar? Dien ons dieselfde God? Beslis. Is bekering vir ons ook nodig? Eis ons Eienaar ook terugkeer van ons? Dit is die vraag van vanmiddag se prediking. Waaroor gaan Jesaja?: Immanuel God met ons ; Geloof in Hom, dat Hy verlossing kan en sal bewerkstellig. Jesaja, die profeet, die mondstuk van God, tree op in die tyd net voor en ook tydens die ballingskap van Juda. Hoofstuk 1 val binne die tyd waar die Here deur Jesaja Sy volk roep tot bekering. In vers 1,2 staan: die gesig wat hy gesien het m.b.t. Juda en Jerusalem aan die kinders van God wat Hy grootgemaak en opgevoed het. Die oproep tot bekering is hier gerig aan die wat God al ken. Die Jode, nageslag van Abraham, wat by pa en ma al die verhale gehoor het oor die verlossing uit Egipte, die gebeure by die Rooi See, die verhale van die groot en magtige konings. Sondag 33 val onder die derde deel van die Kategismus ons dankbaarheidslewe. Sondag 33 het dus te make met ons wat reeds kennis dra van ons uitverkiesing en verlossing van ons sonde deur Christus. Ons wat God al ken, of dalk van hom gehoor het; wat die verlossing uit Egipte, die gebeure by die Rooi See, die hele OT en NT geskiedenis kan lees. Hierdie Sondagsafdeling gaan ook oor bekering, maar ons verlossing van ons sonde en ellende is reeds bespreek, so dit gaan nie hier oor ons eerste bekering, m.a.w. die bekering vanaf ongelowige na gelowige nie. Dit gaan oor ons daaglikse bekering. Oor ons verantwoordelikheid in God se verbond. Eerste moet ons vra na Wie moet ons ons bekeer, voordat ons kan vra, hoe ons moet bekeer. 1

2 (Het ons ook ons Eienaar versaak?) Luister na vers 2&4: Hoor, o hemele, en luister, o aarde, want die Here spreek: Ek het kinders grootgemaak en verhoog, maar húlle het teen My oortree...hulle het die Here verlaat, die Heilige van Israel verag, hulle het agtertoe weggedraai. Hoor u ook die stem van n besorgde Vader? Soos n ouer, benoud oor die ongeluk wat n kind oor homself gaan stort weens sy ongehoorsaamheid. Die Here sê hier: Juda, my kind, Ek het jou grootgemaak. Ek is jou Vader, wat jou opgevoed het, vertroos het, bemoedig het. Maar Ek is ook jou Vader wat jou in liefde tug. Jy is ongehoorsaam. Hoor, o hemele, luister, o aarde. Die hemel en aarde is getuies dat God se oordeel regverdig is. Hemel en aarde; die sterre en planete volg die bane wat God uitgesit het. Die elemente sonder verstand, sal hul Eienaar gehoorsaam, maar die kinders van God weier. Jesaja sê: dalk luister die blou lug, die droeë grond, maar die kinders van God wil nie meer hoor nie. Selfs n stomme os weet instinktief wie sy eienaar is! Hoor u wat sê die HERE? Die kind van God, opgevoed deur God self (vers 2) hou hom dommer as n esel. Die dienskneg weier om kinderlik God te ken as Sy Eienaar. Die rebelerende kind leef asof hy sy Vader nie ken nie. Die dienskneg weier om na sy lewensbron, sy krip, sy Eienaar te gaan. Dit het n invloed op hulle hele land, soos ons in vers 7 sien: Julle land is n wildernis, julle stede is met vuur verbrand, vreemdes verteer julle landerye in jul teenwoordigheid, en dit is n wildernis soos by n omkering deur vreemdes. Julle word ingeval deur vyande, hulle kom tot tot in julle teenwoordigheid. En dan vra julle nog hoekom. Julle land lyk soos Sodom en Gomorra! Vers 6 sê Jesaja: julle is al deurtrek van die wonde en seerplekke, soos die Here julle getug het. Die houe is nog vars! En tog wend julle geen poging aan om terug te keer nie. Ons land is n wildernis. Ons kla graag oor ons land. Wie sal ons blameer? Die staat? Ja. Die munisipaliteit? Beslis. Myself? Nooit. Kyk hoe trek Jesaja die kring al hoe nader in vers 7: jou land, jou stad, jou landerye. Ja, ons het nie beheer oor alles nie. Ons kan nie die hele land bekeer nie. Ons kan nie die hele stad uit die as laat verrys nie. Maar ek wat my Eienaar dien, kan begin by my landerye. By my daaglikse werk. By my studies. Daar dien ek my Eienaar. Ken ek my Vader, of is ek n rebelerende kind, vol vars wonde en kneusplekke, wat weier om te bekeer? Moet Jesaja maar liewer preek vir die lug en die droë grond, of sal ons terugdraai? Daaglikse bekering in die algemeen vir alle gelowiges regoor die wêreld is nodig. In baie opsigte, het ons ook ons Eienaar versaak. Nou vra ons, hoe draai ons terug? 2

3 (Wat is ware bekering?) God gee bekering. Bekering word deur die Gees van God gewerk, vrymagtig, volstrek; maar die daaglikse bekering is 100% my verantwoordelikheid. Wees gewillig en luister (vers 19. Vergl. Matt 3:2, Hand 2:38). Dit is n oproep, n keuse! God het uiverkies, God is die gewer van geloof, maar ek moet daagliks stry teen die swakheid van my geloof weens die sondeval. God se verbond laat ons nie toe om rustig terug te sit in die gemak van ons uitverkiesing nie. Nee, God eis getrouheid. God kan eis, want God het gegee! God gee ten volle, daarom hou hy my ook ten volle verantwoordelik. God se verbondsbeloftes ontvang ons graag met ope arms, maar wanneer dit kom by sy verbondseise, maak ons of ons nooit daarvan gehoor het nie. Daarom is bekering nodig, want God se verbondsbedreiging is ook realiteit. Daarvan getuig Juda se ballingskap (later in Jesaja). Jesaja sê die volk het agtertoe weggedraai. Dit is die weg van die natuurlike mens agtertoe. Bekering is om in te gaan teen die neiging van die natuurlike mens. Vorentoe. Dit is terugdraai na Christus teenoor wegdraai van Christus, dit is lewe teenoor dood. Ware bekering is n saak van ewige lewe, of ewige dood. Bekering is nie bloot besluit om op te hou verkeerd doen nie. Ware, daaglikse bekering, is verandering van hart en hoof (vers 5), van my wil, my morele waardes dis verandering van die hele menslike wese! Dit is: afsterf van die ou mens en opstaan van die nuwe. Afsterf is: (Berou) a) Berou oor die sonde b) Haat vir die sonde en c) Wegvlug van die sonde Waarom moet die volk bekeer? Hulle is mos uitverkore en gered? Hier lê die volk se gesindheidsprobleem. Hulle toon geen berou nie. Hulle het gemaklik geraak. Die Here vra daaglikse bekering want Hy kan dit nie verdra om Sy volk in pyn te sien nie. Van die voetsool af tot die hoof toe is daar geen heel plek aan nie, maar wonde en kwesplekke en vars houe! Hulle is nie uitgedruk of verbind of met olie versag nie. Hoor U weer die bekommerde Vader, die besorgde geneesheer? Ek wil nie my kinders vol wonde en seerplekke sien nie. Julle lyk soos bekeerdes. Julle bid gereeld en julle gedra julself gelowig, sê die Here in vers 11. Maar julle gesindheid is verkeerd. Dit lyk of julle My ken, maar ek ken julle hart en julle wil. Julle is skynheilig. Ek verlang soveel te meer na die 3

4 offer van julle hart. God soek n tipe mens. Nie Farriseërs wat slaafs die Godsdienstige feeste navolg nie! Hy soek bekeerde harte! Vers 14: Julle nuwemane en julle feestye haat my siel; hulle is My n oorlas. Ek is moeg om dit te dra Hier gebruik die Here n beeld om te beskryf dat Hy genoeg gehad het van skeinheilige onbekeerdes. Ja, julle moet die feeste nakom. Maar as dit met onbekeerde hart en wil gevier word, los dit liewer! Hy haat dit! Soms is ons so besig met die godsdiens, dat ons God vergeet. Selfs as julle vir my bid met julle hande uitgestrek, luister ek nie, want julle hande is vol bloed leer vers 15. Nou sien ons die Fariseër en die tollenaar biddend in die tempel (Lukas 18). Vroom staan die Farriseër, hande na bo uitgestrek: o God, dankie dat ek nie soos ander mense is nie...ek vas twee keer n week, ek gee my tiendes. Half weggesteek uit die sig van die Fariseër, die tollenaar. Sy hande slaan op sy bors: o God, wees my, sondaar genadig! Dit is vir God aanneemlik. Opregte, bekeerde harte vol berou oor die sonde. Die Here haat dit as ons erediens toe kom sonder n wil en gesindheid om te bekeer! As jy kerk toe kom soos n getroue dienskneg, maar jy leef soos iemand wat nie sy Eienaar ken nie. Die Here maak Sy oë vir jou toe as jy arrogant jou bloedbevlekte hande voor Hom indruk. My fisiese hande wat die boosheid so kunstig bewerk en bewaak (teenoor opdrag van Genesis 2). Maar ook die hande van ons gedagtes. Wat steel. Wat moor. Ons almal is skuldig hieraan. Dit maak ons onbeskryflik hartseer. Bedroef. Hoe kan ek dit doen? En hierdie is n Godgegewe berou. My berou oor die sonde is God wat my verantwoordelikheid om te bekeer aanwakker! Daarom sê die Here in vers 16: Was julle, reinig julle. Was jou hart. Reinig jouself. Dit is hoe jy toon dat jy berou het. Verskeurde harte, nie verskeurde klere nie (Job 2:12)! Nie heeldag rondloop met n hartseer gesig nie. Ja, daar is plek daarvoor, maar eers is dit jy en die Here. Jy wat voor jou Vader kom met diepe berou. My berou oor die sonde ontketen n proses van haat vir die sonde en wegvlug daarvan. Ek wil ophou om kwaad te doen (vers 16). Dit beteken: (Haat) Ek haat die sonde, want God haat dit. God is goed, wat beteken dat God die bose haat. Hoe anders is die natuurlike mens nie. Die natuurlike mens haat die goeie, en haat God (Sondag 2). Dus, die wat hul Eienaar wil dien, haat die natuurlike, 4

5 sondige mens. Ek haat die boosheid met onophoudelike ywer. Ek het Godgegewe berou oor my sonde. Ek weier om God te bedroef. Ek ken my Eienaar. Ek haat dit wat Hy haat. My haat vir die sonde beteken niks minder nie as geestelike selfmoord. Die natuurlike mens moet dood! Elke dag neem ek die boosheid van my handelinge voor God se oë. Ek al hoe minder, God al hoe meer. Elke dag is n doodsvonnis vir die ou mens. Ek kan nie iets haat en nie daarvan af wegvlug nie. Ware bekering is dan ook: wegvlug van die sonde. (Wegvlug) Die wegvlug van die sonde is n kenmerk van ons haat vir die sonde. Die mens dink altyd dat hy staande kan bly tussen die sonde. Nie waar nie? Hierdie dinge, wat ek weet God haat, sal my nie beïnvloed nie. Lot dink dit toe hy na Sodom trek. Die dogter van Sion, soos Jerusalem genoem word, dink dit ook. Die Here vra haar (vers 12): wie dink jy is jy dat jy voor my aangesig kom verskyn, dat jy my voorhowe kom vertrap, terwyl jy jou gedra soos n inwoner van Sodom en Gomorra? Vlug van Sodom en Gomorra! Vlug, voordat God jou forseer om te vlug, soos Hy ook Lot en sy gesin laat vlug toe Hy Sodom verwoes het (Genesis 19). Vlug van die sonde na jou Eienaar. Leer om goed te doen, soek die reg sê vers 17. En ook: beteuel die verdrukker, doen reg aan die wees, verdedig die saak van die weduwee. Staan van jou tyd af vir ander. Bemoei jou met ander se swaarkry. Wees vir ander wat Christus vir jou is. So getuig ek van my bekering. Christus het uit die dood uit opgestaan. Daarom is daar ook opstanding van die nuwe mens! Ek is saam met Hom dood, ek is geregverdig. Maar ek staan ook saam met Hom op. Dit is heiligmaking! Die daaglikse bekering is n proses. Ek kan nie sê: vandag het ek die ou mens afgesterf, en nou gaan die nuwe mens opstaan nie. Nee, afsterf en opstaan is inmekaar verweef. Want om af te sterf, beteken om op te staan. Die opstanding van die nuwe mens is: a) Hartlike vreugde en b) n Lus en liefde om volgens die wil van God in alle goeie werke te lewe. (Opstanding is n hartlike vreugde) Ons hartlike vreugde volg in vers 18: Kom nou en laat ons die saak uitmaak, sê die Here: al was julle sondes soos skarlaken, dit sal wit word soos sneeu; al was dit rooi soos purper, dit sal word soos wol. Juda, keer terug na jou Eienaar sê die HERE. Jou sondes is baie, maar My genade is meer. As julle gewillig is en luister (vers 19), is daar totale vergifnis. 5

6 Hoekom? Want n Kind is vir ons gebore, n Seun is aan ons gegee; en die heerskappy is op sy skouer, en Hy word genoem: Wonderbaar, Raadsman, Sterke God, Ewige Vader, Vredevors (Jesaja 9:6). Ten spyte van alles, bedek Christus al my ongeregtighede. By Hom was daar nog altyd vergewing. Christus se gebede (Heb 5:7), sy offer, het ons bloedbevlekte hande gewas. Jesaja 43:1:...so sê die Here, jou Skepper, o Jakob, en jou Formeerder, o Israel: Wees nie bevrees nie, want Ek het jou verlos; Ek het jou by jou naam geroep; jy is myne! Jy is myne, Ek het jou gekoop met die bloed van Christus! Dit werk in my n ongekende liefde vir my God. Liefde vir God en liefde vir my naaste. Ek wil my Eienaar ken deur Sy Woord te bestudeer. Meer nog, ek wil Hom dien, ook in my bediening van ander! (Lus en liefde om volgens die wil van God in alle goeie werke te lewe) Daaglikse bekering gaan altyd oor tot aksie! Ons mag nooit die krag van die daaglikse bekering onderskat nie. Die daaglikse bekering word met dieselfde krag in en deur ons gewerk as die krag wat Christus uit die dood uit opgewek het. Dit is lewewekkend! Ek wil nou die dinge van vers 17 doen! Ons kerke sukkel om gemeentes meer missionêr gefokus te kry. Maar hier, in my, persoonlike, daaglikse bekering lê die missionêre gesindheid van die kerk. Omkeerstrategie? Sondag 33. Bekering is die ware omkeerstrategie. Ons vat saam: Ons versaak in baie opsigte ook ons Eienaar. Jou Eienaar eis terugkeer. Jy is en bly Sy eiendom, want jy is duur gekoop met die bloed van Christus. Kind van God. Daarom is jou Eienaar, ook jou Vader. Immanuel God met ons. My daaglikse bekering - berou oor die sonde, haat vir die sonde en wegvlug van die sonde is hoe jou regverdiging, hoe die offer van Christus aan die kruis, vir jou, hande en voete kry! Afsterf is opstaan! Hartlike berou word hartlike vreugde. Haat vir die sonde is liefde vir God. Wegvlug van die sonde is n lus en liefde om volgens die wil van God in alle goeie werke te lewe. Hoe begin ek vandag met my daaglikse bekering? In eie landerye. In my binnekamer. By my klasse. Met my studies. Hier dien ek Hom van harte! AMEN. 6

7 BIBLIOGRAFIE Sawyer, J.F.A. A Critical and Exegetical Commentary on Isaiah 1-27 Bybel in Praktyk Bybellennium Buchanan, G. A Critical and Exegetical Commentary on Isaiah Brown-Driver-Briggs. Calvyn. Kommentaar op Jesaja. Complete Word Study Dictionary: Old Testament. De Klerk, P.J.S. Woorde en dade van die profete. Daily Study Bible Series: Isaiah. Eerdmans Commentary on the Bible. Feenstra, J.G. Leer en lewe. Tyndale. Koehler, L. & Baumgartner, W. The Hebrew and Aramaic Lexicon of the Old Testament. Swanson, J. Dictionary of Biblical languages with Semantic Domains: Hebrew. Schilder, K. Erfenis en betekenis. Mathew Henry. Commentary on Isaiah. McKenna, D. The Preachers commentary series. Volume 17. Word Biblical Commentary Vol 44. Hill & Walton. A Survey of the Old Testament. Motyer, J.A. The Prophecy of Isaiah: An introduction and commentary. Pulpit Commentary. Ursinus. De Bruyn, P.J. Your only comfort: the heidelberg catechism for mankind today. Interpreters Bible. Owens, J.J. Analytical Key to the Old Testament. Wielenga. B. Onze Catechismus. Bijl. C. De bron van ons geloof. Boogaards, A.H. Troos, troos my volk. 7