KERSDAGPREEK - PAARLBERG - 25 DESEMBER 2017 Mat 1:1-17 Die geslagsregister van Jesus Christus, die Seun van Dawid, die seun van Abraham: (2) Abraham was die vader van Isak, Isak van Jakob, en Jakob van Juda en sy broers; (3) Juda was die vader van Peres en Serag by Tamar, Peres van Gesron, en Gesron van Ram; (4) Ram was die vader van Amminadab, Amminadab van Nagson, en Nagson van Salmon; (5) Salmon was die vader van Boas by Ragab, Boas van Obed by Rut, Obed van Isai; (6) Isai was die vader van koning Dawid. Dawid was die vader van Salomo by die vrou van Urija; (7) Salomo was die vader van Rehabeam, Rehabeam van Abia en Abia van Asa; (8) Asa was die vader van Josafat, Josafat van Joram, en Joram van Ussia; (9) Ussia was die vader van Jotam, Jotam van Agas, en Agas van Hiskia; (10) Hiskia was die vader van Manasse, Manasse van Amon, en Amon van Josia; (11) Josia was die vader van Jojagin en sy broers. Toe is die volk weggevoer na Babilonië toe. (12) En na die Babiloniese ballingskap was dit so: Jojagin was die vader van Sealtiël, en Sealtiël van Serubbabel; (13) Serubbabel was die vader van Abihud, Abihud van Eljakim, en Eljakim van Asor; (14) Asor was die vader van Sadok, Sadok van Agim, en Agim van Elihud; (15) Elihud was die vader van Eleasar, Eleasar van Mattan, en Mattan van Jakob;
(16) Jakob was die vader van Josef, die man van Maria uit wie gebore is Jesus wat Christus genoem word. Preek: Seker nou nie die roerendste teksgedeelte was mens op n kersdag kon gelees het nie! Maar ek dink nogal as my Ma nou nog geleef het, dink ek sy sou van die teksgedeelte gehou het. As ek nuwe vriende of vriendinne by die huis aangebring het, het sy gewoonlik gevra: Nou van watter Conradies is jy? Wie is jou Pa en Ma? Waar het hulle gewoon? En dan het sy so bly invra tot sy op die ou einde agtergekom het dat die vriendin verlanges familie is. Ek was later bang om meisies huis toe te bring bang ons kom ager ons is familie! Is hier van julle wat ook so hou van familiestambome? Dit is natuurlik baie interssant en soms, as mens so langs die stam van die stamboom afgaan, kry mens interssante mense. Sommige grênt mense wat in hoë posisies was. Maar, en dis hoekom ek maar wegbly van stambome af, kry mense ook snaakse kreature oor wie mens nie eintlik wil praat nie en tog is hulle familie! En nou het ons gelees dat Matteus nie begin deur
die geboorteverhaal van Jesus te vertel nie, maar deur die stamboom van Jesus uit te lê. Hoekom doen hy dit? Hoekom los hy nie liewer die klomp vervelige name uit nie? Vir wat wil ons nou weet dat Ram die vader van Amminadab was en Salmon se pa Nagson was? Wat het dit met die prys van eiers uit te waai? Matteus doen dit vir n baie goeie rede. Eintlik n paar redes. In die eerste plek skryf hy veral vir die Jode (waarvan hy een is). Vir hulle was dit belangrik om te weet dat Jesus uit die nageslag van Abraham is, maw n Jood. Maar hy doen dit ook sodat hulle kan weet dat Jesus gebore is uit die nageslag van Dawid, soos wat die profete voorspel het dat die Messias gebore sou word. Hy wil hulle dus wys dat Jesus wel die Messias is. Maar daar is n derde rede. En eintlik is die rede dat hy ons wil vertel hoe God se liefde werk. Die Jode van daardie tyd was nogals gesteld op wie jy is en waar jy vandaan kom. As jy wou tel onder die who s who? s van daardie tyd, dan moes jou stamboom goed gelyk het. Daar moes n paar sterk name in gewees het. Jou waarde was dus in n mate afhanlik van jou bloedlyn. En nou kom openbaar Matteus hier n paar slegte geheime in Jesus se voorgeslagte. As die
Huisgenoot in daardie tyd al bestaan het, sou daar seker iets op die voorblad gewees het soos: Weet jy waar kom Jesus vandaan? As ons na ander plekke kyk waar dieselfde stamboom aangehaal word, dan los Matteus n paar name uit. As hy dan n paar uitgelos het, kon hy mos maar die name wat mens agter jou hand sê, gelos het, maar hy doen dit nie. Wat meer is, vrouens word nooit in n stamboom van daardie tyd genoem nie en hier noem hy, behalwe Maria, 4 vrouens se name vrouens met n donker geskiedenis. Eers noem hy Tamar. Sy kon geen kleinkinders gee vir Juda nie. Op die ou end vermom sy haar soos n prostituut en haar einste skoonpa slaap by haar (sonder dat hy weet dis sy skoondogter) en verwek n kind by haar. Dis deel van die voorgeslag van Jesus. En dan was daar Ragab. n Heidense Kaänaniet wat ook n prostituut was. Sy help die Joodse spioene om te ontsnap uit Jerigo voor die stad ingeneem word en haar lewe word gespaar en sy word deel van Israel. Sy trou later met n Jood en sy is deel van die stamregister van Jesus. Ook Rut was nie n Israeliet nie, maar n Moabiet wat uiteindelik ingetrou het in Israel en Dawid se
oumagrootjie word. En dan die bekende, berugte Batseba. Sy word nie by die naam genoem nie, maar as die vrou van Uria, wat self nie n Jood was nie, maar n Hettiet en dan ken ons haar Son-storie met Dawid. Ook sy was een van die ouma s in die lyn van Jesus. Maar dis nie net die stamboom van Jesus wat vir ons n baie belangrike ding wil kom sê nie. Wanneer Jesus gebore word, is dit seker die belangrikste gebeurtenis wat ooit op aarde kon gebeur het. En belangrike gebeurtenisse sê mense gewoonlik eerste vir mense wat tel. Die mense wat eerste die nuus hoor, is die herders. Herders was in daardie tyd as onrein mense beskou vanweë die werk wat hulle gedoen het. Daarom kon hulle nie na die tempel kom voor hulle nie gereinig is nie. Hulle kan, by wyse van spreke, nie kerk toe kom nie. Maar dis juis hulle wat eerste uit die mond van engele die boodskap hoor. Wat hoor ons vanoggend op hierdie Kersoggend in 2017? God kies nie net die voorbeelde in die samelewing of die grent mense nie. Hy gebruik ook ontroue egbrekers, prostitute, sondaarmense, onreines om Sy plan op aarde uit te voer en Hy sluit hulle in as Sy aardse familie. Ons weet nie of dit Matteus, wat ook Levi die
tollenaar was, wat die Evangelie geskryf het nie, maar as dit hy was, sou hy dit ook goed verstaan het. Hy was eintlik n verraaier deur as tollenaar sy eie mense te bedrieg en homself te verryk, maar Jesus kom nie na hom en sê: Levi, verander jou lewe en dan kan jy my volg nie. Jesus sê net vir hom: Volg my en toe hy Hom volg, toe verander Jesus sy lewe. As ek dink dat ek aan die Here behoort omdat my lewe redelik in plek is, ek nie te veel publieke sondes het nie en n getroue kerkganger is, dan wil die Woord vanoggend vir my kom sê: 1 Kor 10:12 Daarom, wie meen dat hy staan, moet oppas dat hy nie val nie. God kom red ons nie omdat ons oulike mense is nie, maar ons is deel van Sy familie ten spyte van wie ons is en wat ons doen. As ek dink dat my lewe redelik skoon is en ek op n manier n goeie kans het om gered te word, moet ek weer dink. Rom 3:10-12 Daar staan immers geskrywe: Daar is nie een wat regverdig is nie, selfs nie een nie, (11) daar is nie een wat verstandig is nie; daar is nie een wat na die wil van God vra nie. (12) Almal het afgedwaal, almal het ontaard. Daar is nie een wat goed doen nie, selfs nie een nie.
Eintlik sal ek dan ook nooit vrede in my hart hê oor my redding nie omdat ek altyd maar bewus is van sondes en swakpunte in my lewe. Ek bedoel: Hoe goed is nou eintlik goed genoeg? God kom red jou deur Jesus tsv wie ek en jy is net uit genade, onvoorwaardelik. Joh 1:16-17 Uit sy oorvloed het ons almal genade op genade ontvang. (17) God het die wet deur Moses gegee; die genade en die waarheid het deur Jesus Christus gekom. Miskien kyk jy ook na ander mense met oë wat hulle meet meet of hulle gaan inpas in die Koninkryk van God. Dan sit ons vir hulle etikette om die nek: Nie goed genoeg nie. Kersfees roep ons almal om in baie groot nederigheid onsself te sien vir wie ons is: Sondaars wat gered is uit genade en liefde alleen. Laat ons God dan uit dankbaarheid volg en dien en ook n oop hand en hart uitsteek an ander mense en versigtig wees om ander te judge. Maar net dalk is hier van ons wat vanoggend hier is wat eintlik min kerk toe kom omdat ons nie eintlik tuis voel in die kerk nie. Daar kan baie redes voor wees, maar dit kan wees dat jy voel dat jou
lewe nie goed genoeg is om deel van die kerk te wees nie. Dinge wat jy lank terug gedoen het of op die oomblik mee besig is dat dit jou diskwalifiseer. Dalk is daar kerkmense wat jou laat voel het dat jy nie hier tuishoort nie. Een of ander slegte ervaring met die kerk dalk gehad. As daar in Jesus se familie plek is vir Tamar en Ragab en Rut en Batseba, dan is daar verseker ook vir jou en my plek in Jesus se familie. Nie een van ons kon die prys betaal vir ons sonde nie. Daarom is Jesus gebore in Betlehem ook vir jou en my. As jy gedink het dat jy eers vorentoe jou lewe in orde wil kry en dan dit sal oorweeg om Jesus te volg, as jy so gedink het, dan kom staan Jesus vanoggend ook voor jou, net soos jy is, en, soos vir Levi, kom sê Hy: Volg my! Jy hoef nie eers jou lewe reg te skud nie. Jy hoef nie eers goed genoeg te raak voor jy Jesus kan volg nie. Jy hoef ook nie eers n regte gevoel of emosionele opwelling te ervaar nie. Jy kan, net soos Levi, deur n doodgewone keuse wat jy maak, besluit om Jesus te volg. Maar laat ek jou waarsku: As jy dit besluit, gaan jy nie dieselfde bly nie. Jesus verander ons altyd, al neem dit n leeftyd. Op hierdie Kersdag wil Jesus jou nooi om Hom te volg, net soos jy is en meer en meer sy liefde te
beleef deur jou lewe en na ons dood. As jy vanoggend die behoefte het om vir die eerste maal of dalk by hernuwing jou lewe in Jesus se hande te plaas, dan nooi ek jou om in jou hart saam met my te bid: Gebed: Here Jesus, hier staan ek vanoggend voor U as n mens wat niks verdien nie. Wat eintlik verdien om verlore te gaan. Maar ek hoor vanoggend dat U U hand na my kom uitsteek en my kom nooi om deel van U familie te word en te bly net omdat U my so baie en onvoorwaardelik liefhet. Here, ek wil U volg. Kom lei my asb deur U Gees op die nuwe pad in my lewe die lewe wat U vir my kom gee. Dit bid ek op hierdie Kersdag in Jesus se Naam. Amen Amen.